ਸਵੇਰੇ ਪੰਜ ਵਜੇ :
ਬੂਹੇ ਹੇਠੋਂ ਸਰਕਦੀ ਹੈ
ਅਖ਼ਬਾਰ ਦੀ ਕਲੱਤਣ
ਕਮਰੇ 'ਚ ਫੈਲ ਜਾਂਦੀ ਹੈ
ਲਹੂ ਦੇ ਛੱਪੜ ਵਰਗੀ ਕੁੜੱਤਣ।
ਸਵੇਰੇ ਛੇ ਵਜੇ :
ਰਸੋਈ 'ਚ ਚਾਹ ਬਣਦੀ ਹੈ,
ਉਸ ਛੱਪੜ ਵਿੱਚ ਦੀ
ਛਲੱਪ-ਛਲੱਪ ਕਰਦੀ
ਪੈਰ ਪੁੱਟਦੀ
ਮੇਜ ਤੇ ਆ ਟਿਕਦੀ ਹੈ.....।
ਸਵੇਰੇ ਸੱਤ ਵਜੇ :
ਡਰਾਇੰਗ ਰੂਮ 'ਚ
ਮੈਂ ਤੇ ਦੋਸਤ ਗੱਲੀਂ ਲੱਗੇ ਹਾਂ
ਟੈਲੀਵਿਜ਼ਨ 'ਚ ਖ਼ਬਰਾਂ ਸ਼ੁਰੂ ਹੁੰਦੀਆਂ ਨੇ......
ਲੋਥਾਂ ਦੇ ਜੰਗਲ 'ਚ
ਵਤਨ ਦੀ ਕੋਈ ਧੀ
ਕਿਸੇ ਬੰਬ ਸਰਾਹਣੇ ਬੈਠੀ
ਵੈਣ ਪਿੱਟ ਰਹੀ ਹੈ।
ਮੇਰਾ ਦੋਸਤ ਰਿਮੋਟ ਚੁੱਕਦਾ ਹੈ
ਆਵਾਜ਼ ਮੱਧਮ ਕਰਦਾ ਹੈ।
ਅਸੀਂ ਚਾਹ ਦੀ ਚੁਸਕੀ ਭਰਦੇ ਹਾਂ
ਤੇ ਮੇਰਾ ਦੋਸਤ
ਮੈਨੂੰ ਸੁਣਾਉਣ ਲੱਗ ਜਾਂਦਾ ਹੈ
ਇੱਕ ਤਾਜ਼ਾ ਮਸਾਲੇਦਾਰ ਚੁਟਕਲਾ......!
Subscribe to:
Post Comments (Atom)
No comments:
Post a Comment