ਪਿੰਡ
ਆਪਣੇ ਹੀ ਘਰ ਹੁਣ
ਸਵਾਗਤ ਹੁੰਦਾ ਹੈ ਮੇਰਾ
ਮਹਿਮਾਨਾਂ ਵਾਂਗਰ
ਵੱਡੇ ਪਲੋਸਦੇ - ਬੱਚੇ ਘੇਰਦੇ
ਜੇਬਾਂ 'ਚੋਂ ਟਟੋਲੀਆਂ ਜਾਂਦੀਆਂ ਨੇ ਵੰਗਾਂ
ਗੁੱਡੀਆਂ ਪਟੋਲੇ
ਰੰਗ ਬਰੰਗੀਆਂ ਕਿਤਾਬਾਂ
ਤੇ
ਘਰ ਦੀਆਂ
ਲਿਓੜ ਲੱਥੀਆਂ
ਕਈ ਕਿਸਮ ਦੀਆਂ ਕੰਧਾਂ ਨੂੰ
ਆਉਂਦੇ ਕਈ ਕਿਸਮ ਦੇ ਮੀਂਹਾਂ 'ਚ
ਡਿੱਗਣੋਂ ਬਚਾਉਣ ਦਾ ਜੁਗਾੜ
...............
ਮੈਨੂੰ ਹਰ ਵਾਰ ਲੱਗਦਾ ਹੈ
ਕਿ ਦਰਵਾਜ਼ੇ 'ਚ ਖੜੋਅ
ਸ਼ਗਨਾਂ ਦਾ ਤੇਲ
ਖੁਦ ਆਪਣੀ ਦੇਲ੍ਹੀ ਤੇ ਚੋਅ
ਘਰ ਦੇ ਬਾਹਰੋਂ ਹੀ
ਵਾਪਸ ਪਰਤ ਆਇਆ ਹਾਂ......
No comments:
Post a Comment